మల్లె మనసు

చిన్నారి చిందించు చిరునవ్వు సిరిమల్లె

కలల కన్నెమనసు కాడ మల్లె.

లేతభావమ్ముల లేలేత పూతలు

ప్రతిఫలింప జేయు పసిడిమల్లె.

వలపు వన్నెలు చిందు వనిత మదిని పొంగు

ఊహలందు విరియు బొండు మల్లె.

తనువు తాపమునంత దరికి చేరగజేసి

దూరమ్ము చేయునే దుడుకు మల్లె.

మల్లె మనసు జూడ మమత విరియ జేయు

మమత విరియజేయు మనసు మల్లె.

మల్లెపూవు వంటి మనసు కలిగెనేని

మదిని విరియు నెపుడు మల్లె తోట.